Make your own free website on Tripod.com

«TATAR ĞAZETASI»

AZATLIQ RADİOSI ÖÇEN İREK BİKKİNİN


MORDOWİÄDA ŞÄXSİ STİPENDİÄLÄR PRAQTİQASI ÜSÄ BARA

Xäbär 2003 yılnıñ 24 fevralendä yazıldı.

Azatlıq radiosın tıñlawçılar belä inde – Mordowiäda yarlı, ämma sälätle tatar studentları öçen ike şäxsi stipendiä birelä. Ber stipendiänı Almatı şähärendä yäşäwçe kompyuterçı-programmist Ruslan Abdulxaliqov tüläp tora, ikençe stipendiänı – Mäskäw şähärennän Marat Devlet-Kildeyev.

Berençe stipendiäne 2001 yıldan birle Mordowiä uniwersitetınıñ meditsina faqültetı studentı Ğülnära Qapqayıwa alıp tora, ä ikençe stipendiä 2002 yılnıñ aprelennän Saranskida pedağogiä institutınıñ fiziqä-matematiqa faqültetında uquçı Asiä Qarmışewağa birelde.

Bu könnärdä Mordowiä Respublikasında şundıy tağı ber stipendiä bireläçäk dip iğlan itelde. Bu öçençe stipendiänı kürenekle eşmäkär Şämil Bikmayıv biräçäk. Şulay itep, tatar dönyasında moña qädär kürenmägän häm belenmägän yaña närsä – şäxsi stipendiälar tüläw praqtiqası – Mordowiäda üsüen däwam itä.

Rossiänıñ tatarlar yäşägän üzgä töbäklärendä mondıy şäxsi stipendiälar turında älegä işetelgäne yuq, qızğanıçqa qarşı. Ä bit xalqıbıznıñ kiläçäge öçen bu bik möhim eş.

Bu şäxsi stipendiä tüläwneñ üz qağidäläre dä bar. Şäxsi stipendiänı ayırım ber keşe üzeneñ şäxsi aqçasınnan matdi yärdäm räweşendä tüläp bara. Mondıy stipendiänı aluçı student yäki uquçı bik yaxşı uqırğa tieş, hiçşiksez sälätle bulırğa tieş, tatar telenä häm mädäniätenä mönäsäbäte dä möhim. Älbättä, ğailäse materiäl yaqtan yaxşı yäşägän studentlarğa mondıy stipendiä birelmi.

Qızğanıçqa qarşı, aqça belän problemaları bulğan ğailälärdän studentlar küp tügel şul. Aqçañ bulmasa, yuğarı uqu yortında uqırğa kerüye dä xäzerge zamanda bik awır. Ämma uqırğa kerälgän yarlı studentlarğa yärdäm itü bik kiräkle. Şämil Bikmayıv, üzeneñ stipendiäsın iğlan itkändä, şulay äytte: “Sälätsez keşelär bolay da yuğarı urınnarğa menälär, şunnan sälätle keşelärgä yärdäm itärgä kiräk”, dide.

Şämil Bikmayıv Mordowiä tatarları arasında iñ bay keşe dip sanala. Ul Mordowiä respublikası başlığı Niqolay Merquşkinnıñ kiñäşçese dä, “Yaqtaşlar” cämğıyateneñ şäräfle räise dä. Yıl sayın Şämil Bikmayıvnıñ xäyriä maqsatlarına, yağni matdi yärdäm häm xäyer-sadaqağa 300 meñ sumğa yaqın aqçası kitä. Ul kemgä genä aqça birmi – törle qonqurslarğa da, muzeylarğa da, Lämberädä tatar mädäni üzägenä dä. Äle menä, şäxsi stipendiälar birelä başlanuğa ike yıl tulğanda, Şämil abıy bu praqtiqanıñ ähämiäten añladı häm üze dä ber yarlı, ämma sälätle tatar studentına şäxsi stipendiäsın birä başlarğa äzerlegen belderde.

Şulay itep, tizdän Mordowiäda tağı ber tatar studentınıñ xäle küzgä kürenep uñaylanır. Bu stipendiäğa berniçä qandidat bulsa da, kemgä ul eläger, älegä bilgesez.


© «Tatar ğazetası»
E-mail: irek@moris.ru